Тошкент метроси учун 280 млн долларгача бўлган қийматда 70 та янги вагон сотиб олиш режалаштирилмоқда
Тошкент шаҳар халқ депутатлари Кенгаши пойтахт метроси учун бешта вагондан иборат 14 та поезд сотиб олиш концепциясини маъқуллади. Янги поездлар эскирган вагонларнинг бир қисмини алмаштириш ва йўловчиларнинг кутиш вақтини қисқартиришга хизмат қилиши керак.
2022–2025 йилларда метронинг йиллик йўловчи оқими 136,7 миллион кишидан 287 миллион кишигача ошди. Шу билан бирга, амалдаги вагонларнинг катта қисми бир неча ўн йилдан бери фойдаланиб келинмоқда.
Лойиҳа доирасида еттита ишлаб чиқарувчининг таклифлари кўриб чиқилди. Энг арзон вариант Хитойнинг CRRC компанияси поездлари бўлиб, уларнинг қиймати 118,3 миллион долларни ташкил этади. Энг қиммат таклиф эса Япониянинг Kawasaki компаниясига тегишли бўлиб, 279,1 миллион долларга баҳоланган. Ушбу нархларга поездлар ва уларни етказиб бериш харажатлари киритилган, бироқ лойиҳа билан боғлиқ қўшимча харажатлар ҳисобга олинмаган.
Ҳозирча етказиб берувчи танланмаган. Агар поездлар Россия ишлаб чиқарувчисидан харид қилинмаса, уларга хизмат кўрсатиш учун алоҳида депо ва техник хизмат кўрсатиш базасини ташкил этиш талаб қилинади. Ушбу объектларнинг дастлабки қиймати лойиҳалаш ва бошқа харажатлар ҳисобга олинмаган ҳолда 10,13 миллион долларга баҳоланмоқда.
Харидни кредитлар ҳисобидан молиялаштириш, кейинчалик эса уларни давлат бюджети маблағлари ҳисобидан қайтариш режалаштирилган. Поездлар 2027 йил 1 ноябрга қадар уч босқичда етказиб берилиши керак.
Хариднинг якуний қиймати ва шартлари тегишли тартиб-таомиллар ҳамда музокаралардан кейин белгиланади.