Ўзбекистон МДҲга раислик даврида 100 дан ортиқ тадбирни амалга оширишни режалаштирмоқда
Раисликда амалий натижаларга эътибор қаратилади
Шавкат Мирзиёев МДҲ саммитида сўзлаган нутқида Ўзбекистоннинг Ҳамдўстликка раислиги умумий ҳамкорликка ҳисса қўшиш, янги ғояларни илгари суриш ва мамлакатлар учун муҳим йўналишларни биргаликда ривожлантириш имконияти эканини таъкидлади.
Президентнинг қайд этишича, раислик концепцияси ва тадбирлар режасини ишлаб чиқиш якунланмоқда. Унда ҳар бир йўналиш бўйича аниқ қадамлар, муддатлар ва ҳамкорлик натижалари белгилаб берилиши керак.
«Мазкур дастур оддий ташаббуслар рўйхати бўлиб қолмаслиги биз учун муҳимдир. Ҳар бир йўналиш бўйича аниқ қадамлар, муддатлар ва биз биргаликда эришадиган натижа бўлиши керак», — деди давлат раҳбари.
Саноат кооперацияси ва савдо тўсиқларини бартараф этиш
Президент МДҲ доирасидаги сиёсий мулоқотни мустаҳкамлаш, мамлакатлар ўртасида яхши қўшничилик, ўзаро ишонч ва англашувни сақлаш муҳимлигини айтди. Унинг таъкидлашича, халқаро вазият мураккаблашаётган шароитда турли масалаларни хотиржам муҳокама қилиш ва барча томонлар учун мақбул ечимларни излаш имкониятини сақлаб қолиш зарур.
Иқтисодий ҳамкорликда эса асосий эътиборни саноат кооперациясига қаратиш таклиф этилди. Мирзиёев мамлакатлар ишлаб чиқариш имкониятлари, ресурслари, технологиялари ва бозорларини бирлаштириш, қўшма ишлаб чиқариш қувватларини яратиш ҳамда барқарор етказиб бериш занжирларини йўлга қўйиш тарафдори эканини билдирди.
Шунингдек, ўзаро инвестициялар учун шароитларни яхшилаш ва мамлакатлар ўртасидаги савдога тўсқинлик қилаётган муаммоларни бартараф этиш зарурлиги қайд этилди.
Сунъий интеллект, роботлаштириш ва янги энергетика технологиялари
Ўзбекистон раислиги даврида рақамли технологиялардан бизнесда фойдаланишни кенгайтириш ва электрон тижоратни ривожлантиришга ҳам эътибор қаратилади.
Шавкат Мирзиёев мамлакатлар фақат яхши ривожланган анъанавий соҳалар билан чекланиб қолмаслиги, балки келгуси йилларда иқтисодиёт рақобатбардошлигини оширадиган янги йўналишларда ҳам ҳамкорлик қилиши кераклигини таъкидлади.
Булар қаторига муҳим минераллар, сунъий интеллект, роботлаштириш, янги материаллар ва замонавий энергетика технологиялари киритилди. Президент мазкур соҳаларда миллий салоҳиятни ривожлантириш ва қўшма лойиҳаларни амалга ошириш муҳимлигини айтди.
Марказий Осиёнинг транспорт имкониятларидан фойдаланиш
Нутқда транспорт ҳамкорлиги раисликнинг муҳим йўналишларидан бири сифатида белгиланди.
Президент Марказий Осиё Шарқ ва Ғарб, Шимол ва Жануб ўртасидаги муҳим транспорт тугунига айланиб бораётганини қайд этди. Ушбу имкониятлардан тўлиқ фойдаланиш учун транзит тартиб-таомилларини соддалаштириш, қулай, хавфсиз ва иқтисодий жиҳатдан манфаатли транспорт йўналишларини яратиш зарур.
Шу билан бирга, Ўзбекистон Марказий Осиё транспорт тармоғининг МДҲ ҳудудидаги ва ундан ташқаридаги умумий алоқалар тизимининг муҳим қисмига айланишидан манфаатдор экани таъкидланди.
Терроризм, экстремизм ва кибержиноятчиликка қарши ҳамкорлик
Шавкат Мирзиёев хавфсиз ва барқарор муҳит иқтисодиёт, савдо ҳамда йирик қўшма лойиҳаларни ривожлантириш учун зарурлигини таъкидлади.
Унинг айтишича, раислик даврида МДҲнинг соҳавий органлари фаолиятини ва мамлакатларнинг умумий таҳдидларга қарши курашишдаги саъй-ҳаракатларини қўллаб-қувватлаш давом эттирилади. Бунда терроризм, экстремизм ва кибержиноятчиликка қарши курашишга алоҳида эътибор қаратилади.
Президент, айниқса, кибержиноятчилик тез кучайиб бораётганини қайд этди. Ушбу таҳдидлар оддий фуқаролар, бизнес вакиллари, банклар ва давлат тизимларига таъсир кўрсатаётгани сабабли мамлакатлар ўртасида яқин ҳамкорлик ва доимий эътибор талаб этилади.
Ёшлар, олимлар ва мутахассислар ўртасидаги алоқалар
Президент Ҳамдўстликнинг келажаги мамлакатларни боғлаб турган инсонлар ўртасидаги алоқаларга ҳам боғлиқ эканини таъкидлади.
У талабалар, ёш мутахассислар, олимлар, тадқиқотчилар ва ижодий касб эгалари учун ўзаро мулоқот қилиш, тажриба алмашиш ва биргаликда ишлаш имкониятларини кенгайтириш муҳимлигини айтди.
«Фақат ана шундагина МДҲ таълим олиш, меҳнат қилиш, янги лойиҳалар яратиш, шериклар топиш ва ўз келажагини қуриш мумкин бўлган макон сифатида қабул қилинади», — деди Шавкат Мирзиёев.
Унинг таъкидлашича, мамлакатларнинг инсон ва интеллектуал салоҳияти замонавий ишлаб чиқариш қувватлари, инновациялар ҳамда янги иш ўринларини яратишга хизмат қилиши керак.
Ўзбекистон раислигидаги устувор вазифалар
Давлат раҳбари Ўзбекистон раислигидан Ҳамдўстлик доирасида аввал эришилган натижаларни сақлаб қолиш, шу билан бирга, янги ечимлар талаб қилаётган соҳалар ривожига қўшимча суръат бериш учун фойдаланиш ниятида эканини билдирди.
Президентнинг таъкидлашича, раислик самарадорлиги фақат қабул қилинган ҳужжатлар ва келишувлар билан эмас, балки мамлакатлар келгусида ҳам фойдалана оладиган аниқ натижалар билан баҳоланиши керак.
Шавкат Мирзиёев нутқи якунида Туркманистон президенти Сердар Бердимуҳамедовга меҳмондўстлик ва учрашувни ташкил этгани учун миннатдорлик билдирди. Шунингдек, Эрон президенти Масъуд Пезешкиённи мажлиснинг фахрий меҳмони сифатида қутлади ва Ўзбекистоннинг 2027 йилда МДҲга раислик қилиши тўғрисидаги қарорни қўллаб-қувватлаган ҳамкасбларига ташаккур айтди.