Ўзбекистонда давлат байроғини уйларга илиб қўйиш ва кийим-кечакларга тақишга рухсат бериш режалаштирилмоқда

ЎзЛиДеп партияси ўзбекистонликларнинг кундалик ҳаётида давлат байроғидан фойдаланиш талабларини соддалаштириш таклифи билан чиқди.

Бугун, 18 ноябрь, Давлат байроғи куни Қонунчилик палатасидаги ЎзЛиДеП фракциясининг кенгайтирилган йиғилишида “Ўзбекистон Республикаси Давлат байроғи тўғрисида”ги қонунга ўзгартиш ва қўшимчалар киритиш ташаббуси илгари сурилди. Бу ҳақда партия матбуот хизмати хабар берди.

Тадбирда фракция аъзолари давлат байроғидан фойдаланишда кўплаб чекловлар мавжудлигини таъкидладилар. Бундан 31 йил аввал қабул қилинган қонунни замон талабларига мослаштириш, давлат байроғидан фойдаланишга оид ҳуқуқий меъёрларни янада эркинлаштириш зарур.

Депутатлар таъкидлаганидек, болаларда, албатта, ҳар бир фуқарода давлат байроғига меҳр туйғусини шакллантиришни таъминлаш зарур. Шу боис фуқароларнинг ўз уйлари ва иш жойларида давлат байроғини кўтариб юришига рухсат бериш муҳим аҳамиятга эга.

Фракция аъзоси Зафар Худайбердиев ҳам кийим-кечак ишлаб чиқарувчи тадбиркорларга ўз маҳсулотларида давлат байроғи тасвирини белгиланган тартибда қўллашга рухсат берилишини қонунчиликда мустаҳкамлаб қўйиш зарурлигини таъкидлади.