Шахмат-2022. Ўзбекистон Арманистонни таслим этиб, яққол пешқадамга айланди

Ҳиндистоннинг Ченнай шаҳрида Бутунжаҳон шахмат Олимпиадасида бугун 9-тур ўйинлари ўтказилди. Ўзбекисон эркаклар терма жамоаси мусобақа пешқадами Арманистонга қарши баҳсда иштирок этиб, ишончли тарзда ғалаба қозонишга муваффақ бўлди.

Вакилларимиздан Жавоҳир Синдаров ва Жаҳонгир Воҳидов чиройли ғалабага эришишган бўлса, Нодирбек Абдусатторов ва Нодирбек Ёқуббоев дурангга имзо чекди. Якуний ҳисоб: Ўзбекистон — Арманистон — 3:1.

Ушбу ғалабадан кейин Ўзбекистон терма жамоаси ўз очколарини 16тага етказиб, яққол пешқадамга айланди. Боиси, Ҳиндистоннинг иккинчи жамоаси бугун очко йўқотди (Озарбойжон билан дуранг ўйнади).

Жаҳон олимпиадаси якунланишига 2 тур қолди. Демак, яна 2та ғалаба Ўзбекистонни олтин медалларга олиб келади.

Ўзбекистон аёллар терма жамоаси бугун Исроилга қарши дона суриб, 1,5 : 2,5 ҳисобида имкониятни бой берди.

Манба: stadion.uz