Бокс. Усик чемпионлик камарларини ўзида сақлаб қолди (видеошарҳ)

Саудия Арабистонининг Жидда шаҳрида профессионал бокс кечаси ўтказилди. Кечанинг асосий жангги оғир вазн тоифасида WBA, IBF, WBO ва IBO камарлари соҳиби Олександр Усик ва британиялик Энтони Жошуа ўртасида бўлиб ўтди. Бу боксчилар ўртасидаги реванш жанг ҳисобланади.

Жанг тўлиқ 12 раунд давом этди. Очколар бўйича икки ҳакам устунликни украиналик боксчига берган бўлса (115:113, 116:112), бир ҳакам британиялик спортчининг ғалабасини эътироф этди (113:115).

Шу тариқа, Усик WBA Super, IBF, WBO ва IBO камарларини ўзида сақлаб қолди.

Эслатиб ўтамиз, ушбу боксчилар ўртасидаги дастлабки жанг 2021 йилнинг сентябрь ойида «Тоттенхэм Хотспур» стадионида бўлиб ўтганди. Унда Усик ҳакамларнинг якдил қарорига кўра (117-112, 116-112, 115-113) Жошуа устидан ғалаба қозонган эди.

Манба: stadion.uz