Бойсун тумани ҳокимлиги 398 млн сўмга Trailblazer харид қилди

Сурхондарё вилояти Бойсун тумани ҳокими фармойиши билан техник носоз Captiva — 2 хизмат автомобили бепул тарзда туман прокуратурасига ўтказилди. Шундан сўнг, ҳокимлик 398 млн сўмлик Trailblazer машинасини харид қилиш учун шартнома тузган. Бироқ, ҳукумат қарори билан туман ҳокимларига 270 млн сўмгача бўлган хизмат автомобилини харид қилишга рухсат этилган.

Бойсун тумани ҳокимлиги носоз ҳолатдаги Captiva — 2 машинасини туман прокуратурасига ўтказиб, ҳоким учун 398 млн сўмлик Trailblazer LTZ-AT хизмат автомашинасини харид қилиш бўйича шартнома тузди.

27 октябрдаги хатга мувофиқ, Сурхондарё вилояти ҳокимининг биринчи ўринбосари Ф.Маманов Бойсун тумани ҳокимлиги балансида турган, 2013 йилда ишлаб чиқарилган техник носоз ҳолатдаги Captiva — 2 русумли хизмат автомобилини электрон аукцион орқали сотилиши ва янги хизмат машинаси олинишига эътирози йўқлигини билдирган.

Шунга қарамай, машина электрон аукционга қўйилмаган. Бойсун тумани ҳокими Асқарали Жўраев фармойиши билан мазкур транспорт воситаси оператив бошқарув ҳуқуқи билан бепул тарзда туман прокуратурасига ўтказилган.

«Газета.uz»да реклама

Шундан сўнг, ноябрь ойида туман ҳокимлиги 398 млн сўмлик (БҲМнинг 1474 баравари) Trailblazer LTZ-AT хизмат автомашинасини сотиб олиш учун шартнома тузган.

Шунингдек, ноябрь охирларида Қорақалпоғистон Республикаси Вазирлар Кенгаши ҳам 398 млн сўмга Trailblazer LTZ-AT автомобилини сотиб олган.

Ҳукумат қарорига кўра, туман ҳокимлари хизмат машиналари нархлари БҲМнинг 1000 бараваридан (270 млн сўм), двигатель энг юқори қуввати 2000 сv кубдан ошмаслиги лозим. Агар туман тоғли ҳудуд бўлса, бу қувватни 3000 см кубгача оширишга рухсат берилиши мумкин, бироқ, автомобиль нархининг истисно чегараси кўрсатилмаган.

Маълумот ўрнида, UzAuto Motors компанияси расмий сайти маълумотларига кўра, Trailblazer LTZ-AT`нинг двигатель ҳажми 3564 см кубни ташкил этади.

Аввалроқ, «Газета.uz» йирик вазирлик ва идораларнинг хизмат автомашиналари паркини таҳлил қилиб, мамлакатнинг юқори мартабали амалдорлари қандай автомобиллардан фойдаланишини аниқлагани ҳақида хабар берганди.

Эслатиб ўтамиз, бундан олдин Жиззах вилояти Зарбдор тумани ҳокимлиги хизмат автомобили сифатида Chevrolet Trailblazer LZT-AT сотиб олган эди.