Урганчдаги Жалолиддин Мангуберди мажмуаси очилди — фото

Шавкат Мирзиёев 8 гектар майдонга қурилган мажмуада жойлашган Жалолиддин Мангуберди ҳайкалини очиб берди.

Бугун, 29 август куни Шавкат Мирзиёев Урганч шаҳрида буюк саркарда Жалолиддин Мангуберди ҳайкалини очиб берди. Бу ҳақда Президент матбуот котиби Шерзод Асадов хабар бермоқда.

Маълумот учун, Жалолиддин Мангуберди мажмуаси Урганч шаҳрининг Ал-Хоразмий ва Ислом Каримов кўчалари кесишмасидаги қарийб 8 гектар майдонда бўлади.

Бронзадан Жалолиддин Мангубердининг от устида қилич тутиб турган ҳайкали ясалган. Унинг асоси билан бирга жами баландлиги қарийб 25 метр бўлиб, узоқдан ҳам кўриниб туради.

Эслатиб ўтамиз, 2021 йилнинг сентябрь ойида Шавкат Мирзиёев Урганч шаҳрига ташрифида Жалолиддин Мангуберди мажмуасининг қурилиш жараёнини кўздан кечирганди.