Бокс-2023. Лазизбек Мулложонов ғалаба қозонди ва чорак финалда кубалик жаҳон чемпиони билан тўқнаш келади

Тошкентда ўтаётган бокс бўйича эркаклар ўртасидаги жаҳон чемпионатида айни пайтда 92 кг. вазндаги спортчилар нимчорак финал босқичи жангларини ўтказишмоқда.

Ҳамюртимиз Лазизбек Мулложонов грузилиялик Гиорги Тчигладзега қарши жанг олиб борди. Рақиб боксчиси оғир зарбалар орқали ватандошимизни издан чиқишга уринди. Аммо Лазизбек рақибга бундай имконият бермади. У ҳар бир бўлимда ўз устунлигини қайд этиб қўйди. Ҳатто Мулложонов бироз куч тежаб ҳаракат қилди, дейиш мумкин.

Тчигладзе иккинчи бўлимда огоҳлантирилганини инобатга олганда якуний баҳолар қуйидагича бўлди — 5:0 (30:26, 30:26, 30:26, 30:26, 30:26).

Шу тариқа, Лазизбек Мулложонов жаҳон чемпионатидаги иккинчи жангида ғалаба қозониб, чорак финалга йўл олди. Кейинги босқичда у Белград — 2021 жаҳон чемпионати ғолиби, кубалик Хулио Сезар Ла Крузга қарши рингга кўтарилади.

Манба: stadion.uz