Таэквондо бўйича ЖЧ. Светлана Осипова ярим финалга чиқди

Озарбойжон пойтахти Боку шаҳрида таэквондо WT бўйича жаҳон чемпионати давом эттирилмоқда.

Аёллар ўртасида 73 кг. вазн тоифасида амалдаги жаҳон чемпиони ҳисобланган Светлана Осипова ярим финалга чиқади.

Ҳамюртимиз дастлабки босқичда италиялик Алессандра Илич устидан икки раунд ҳисобига ғалаба қозонди (8-1, 9-3). Нимчорак финалда Светлананинг рақиби АҚШлик Ханна Кек жароҳат туфайли даянга чиқмади.

Осипова учун чорак финал жанги анча қийин кечди. Ватандошимиз марокашлик Фотима Абуфарасга қарши жангнинг биринчи бўлимда кичик 1-0 ҳисобида ғалаба қозонди. Рақиб иккинчи раундда фаолликни оширди ва 11-9 ҳисобида ғалаба қозониб, ҳисобни тенглаштирди. Учинчи бўлимда эса спортчилар ҳисобда қувлашмачоқ ўйнашди. Жанг тугашига 10 сония қолганида Фотима 7-5 ҳисобида олдинда эди. Аммо Осипова рақибининг бошига зарба бериб, 3 очкони қўлга киритди. Натижада ҳамюртимиз сўнгги раундда 8-7 ҳисобида рақибидан устун келиб, жангни ўз фойдасига ҳал қилди.

Светлана Осипова ярим финалда Буюк Британия вакили Бианка Кук билан жанг қилади. Ярим финал ва финал жанглари 19:00га белгиланган.

Манба: stadion.uz