Қиличбозларимиз Осиё чемпионатини битта олтин медаль билан якунлашди

Хитойнинг Уси шаҳрида қиличбозлик бўйича қитъа биринчилиги якунланди. Мазкур мусобақада Ўзбекистон терма жамоаси 1 та олтин медалга сазовор бўлди.

Аёллар ўртасида сабля қуролида кечган беллашувларда барча рақибларини мағлуб этган Зайнаб Дайибекова катталар ўртасидаги қитъа биринчилигида илк ғалабасини тантана қилди. Бошқа йўналишларда эса спортчиларимиз шоҳсупагача етиб бора олишмади.

Ўзбекистон делегацияси медаллар жадвалида 6-поғонани эгаллади. Кучли учликни эса Япония (4-1-4), Жанубий Корея (3-5-4) ва Хитой (2-3-6) эгаллашди. Терма жамоамиз эртага Тошкентга қайтиб келади.

Манба: olympic.uz