Тошкентда 3 ёшли қиз энаганинг уйида вафот этди

Ҳолат юзасидан «хавф остида қолдириш» моддаси билан жиноят иши қўзғатилган.

Аввалроқ, ижтимоий тармоқларда 3 ёшар қизнинг ўлими ҳолати юзасидан видеомурожаат тарқалди. Тошкент шаҳар ИИББ Матбуот хизмати мазкур ҳолат юзасидан маълумот берди.

Қайд этилишича, жорий йилнинг 25 апрель куни 1996 йилда туғилган Д.У. Сергели тумани ИИО ФМБга ариза билан мурожаат қилиб, синфдоши 1996 йилда туғилган Ш.Н.га вояга етмаган фарзанди 2020 йилда туғилган С.У.ни энагалик қилиши учун топширганлигини, лекин фарзанди унинг хонадонида вафот этганлигини маълум қилган.

Текширув жараёнида Ш.Н.нинг билдиришича, 24 апрель куни вояга етмаган С.У. ертўлага тушиш зинасидан йиқилиб тушган, лекин ўрнидан туриб, яна ўйнаб кетган. Шу сабабли, Ш.Н. боланинг онасига бу ҳақда хабар бермаган. Эртаси куни тахминан соат 10:00 ларда С.У. ҳушидан кетиб, йиқилган ва тез тиббий ёрдам ходимлари келгунига қадар вафот этган.

Марҳуманинг ўлим сабабини аниқлаш мақсадида судга оид тиббиёт экспертизаси тайинланган.

Мазкур ҳолат юзасидан ЖКнинг 117-моддаси (хавф остида қолдириш) билан жиноят иши қўзғатилган. Гумон қилинувчи Ш.Н. процессуал тартибда ушланган. Тергов давом этмоқда.