Тошкентда боғча мудирининг ўғли боғчадаги тўрт нафар 6 ёшли қизларга тегажоғлиқ қилгани айтилмоқда

ИИББ ҳолат юзасидан жиноят иши қўзғатди. Бош прокуратура ҳолатни ўз назоратига олди.

Аввалроқ, маҳаллий нашрлардан бирида Тошкент шаҳар Чилонзор туманидаги 230-сонли мактабгача таълим ташкилоти мудирининг 15 ёшли ўғли шу боғчада тарбияланувчи 6 яшар қизларга тегажоғлик қилгани, аммо, йигитнинг ота-онаси бу тухмат эканлигини айтаётгани ҳақида хабар берилди.

Тошкент шаҳар ИИББ Матбуот хизматининг маълум қилишича, жорий йилнинг 2 май куни 4 нафар фуқаролар Чилонзор тумани ИИО ФМБга ариза билан мурожаат қилиб, уларнинг фарзандлари (6 ёшли қизлар) МТТда ухлаб ётган вақтида, вояга етмаган 2008 йилда туғилган Х.Ш. болаларнинг танасини турли қисмларини қўли билан ушлаб, уятсиз бузуқ ҳаракатлар содир қилганлигини маълум қилишган ва Х.Ш.га нисбатан қонуний чора кўришни сўраган.

Мазкур ҳолат юзасидан Жиноят кодексининг 25-моддаси орқали 119-моддаси билан жиноят иши қўзғатилган. Тергов давом этмоқда.

«Жиноят иши доирасида барча ҳолатлар батафсил ўрганилиб, зарурий тергов ҳаракатлари ўтказилиши ва натижаси бўйича қонуний қарор қабул қилиниши таъминланади», - дейилади хабарда.

Шунингдек, мазкур ҳолат Бош прокуратура томонидан қатъий назоратга олинган.