Ханчжоу-2022: Чавандозларимиз саралашдан муваффақиятли ўтишди

Конкур бўйича Ўзбекистон терма жамоаси аъзолари Осиё Ўйинлари саралашидаги иштирокини якунлашди. Ҳамюртларимиз яккалик ва жамоавий дастурда баҳс олиб боришди. Унда Баҳромжон Газиев («Леди» лақабли отда), Бекзод Қурбонов («Сантос Ҳиппиcа»), Хуршид Алимжонов («Чемпионс лига») ва Умиджон Комилов («Каллеко») юртимиз шарафини ҳимоя қилдилар.

Ўзбекистон йилқичилик ва от спорти федерациясининг маълум қилишича, саралаш баҳсларида 17 мамлакатдан 56 нафар чавандоз иштирок этиб, 40 нафар спортчи ярим финалга йўл олган. Улар орасида ҳамюртларимиздан Б.Газиев, Б.Қурбонов ҳамда Х.Алимжоновнинг номларини учратиш мумкин. Бугун уларнинг отлари санитар текширувдан ўтади. Эртага эса медаллар учун якуний беллашувлар бўлиб ўтади.

Манба: olympic.uz