Ўзбекистонда яна бир таниқли шахс косметологик жарроҳликдан сўнг вафот этди

Ўзбекистон қиличбозлик федерацияси бош ҳаками Аида Хасанова 39 ёшида вафот этди. Унинг соғлиги хусусий клиника косметологик жарроҳликдан сўнг ёмонлашган.

Ўзбекистон қиличбозлик федерацияси Матбуот хизмати жорий йилнинг 23 май куни федерация бош ҳаками, халқаро тоифадаги ҳакам Аида Хасанова 39 ёшида вафот этгани ҳақида хабар берди. UzNews.uz мухбири марҳуманинг эрта ўлими ҳақида маълумот олиш мақсадида Бош прокуратура матбуот хизмати раҳбари Ҳаёт Шамсутдинов билан боғланди.

Унинг берган маълумотига кўра, Аида Хасанова хусусий клиникаларнинг бирида косметологик жарроҳлик амалиётини ўтказиб, соғлиғи оғирлашганлиги сабабли 23 май куни соат 14:00 да клиника шифокори томонидан шифохонага ётқизилган. Бироқ, у шифохона шифокорлари томонидан ўз вақтида кўрсатилган тез тиббий муолажаларига қарамасдан, шу куни тахминан соат 18:30 ларда шифохонанинг жонлантириш бўлимида вафот этган.

Марҳуманинг ўлими келиб чиқиш сабабларини аниқлаш мақсадида суд-тиббий экспертизаси тайинланган. Ҳозирда Чилонзор туман прокуратураси томонидан терговга қадар текширув ҳаракатлари олиб борилмоқда.

Маълумот учун, Аида Хасанова кўп карра Ўзбекистон чемпиони, 2001−2006 йилларда Марказий Осиё чемпиони, 2005 йилда Англияда ўтказилган халқаро турнир олтин медали совриндори. У Халқаро қиличбозлик федерацияси (FIE) ҳаками бўлиб, йирик халқаро чемпионат ва турнирларда ишлаган.

Қиличбозлик ривожига қўшган улкан ҳиссаси учун 2017 йилдан Ўзбекистон қиличбозлик федерациясига бош ҳакам этиб тайинланган. У халқаро мусобақаларда юқори натижаларга эришган кўплаб спортчиларни тарбиялаган.

2019 йилда Токиода бўлиб ўтган Олимпиада ўйинларида иштирок этган Ўзбекистон ва Марказий Осиёдан биринчи ҳакам этиб сайланди. Ушбу ўйинларда у Осиёни ҳимоя қилган ягона аёл қиличбозлик ҳаками эди.