Франция спорт вазири Олимпия ўйинлари вақтида хавфсизлик чораларини кучайтирмоқчи
Париждаги Олимпия ва Паралимпия ўйинлари хавфсизлигини таъминлаш учун маҳаллий ҳарбийлар шаклидаги қўшимча кучлар жалб этилиши мумкин. Франция спорт вазири Амели Удеа-Кастеранинг айтишича, бу вариант Париж ўйинлари пайтида хусусий хавфсизлик ходимларининг етишмаслигини қоплаш учун ечим сифатида кўриб чиқилади.
Аввалроқ, Франциянинг бир қанча йирик хусусий хавфсизлик компаниялари Олимпия ўйинларида ўз хизматларини тақдим этишдан бош тортган эди.
«Армиядан фойдаланиш ҳозир кун тартибида эмаслиги сабабли, биз ҳеч бўлмаганда 2024 йил бошигача жамоат хавфсизлигини таъминлаш бўйича энг муҳим чора-тадбирларни аниқлаш билан шуғулланамиз», деди Удеа-Кастера.
Ҳукумат ва ҳарбий амалдорлар яқин ойларда қарор қабул қилишга чақиришди. Бироқ, Удеа-Кастеранинг қайд этишича, бу жараён узоқ давом этади.
Бу ҳарбийларнинг Олимпия ўйинлари хавфсизлигини таъминлашга биринчи марта жалб этилиши эмас. 2012 йилда Лондонда бўлиб ўтган ёзги ўйинларда хавфсизликни таъминлаш учун қўшимча 13500 нафар ҳарбий хизматчи сафарбар этилган. Бунга эришиш учун Британия ҳукумати харажатларни 438 миллион доллардан 859 миллион долларга оширди.
26 июль куни Халқаро олимпия қўмитаси (ХОҚ) 2024 йилда Парижда бўлиб ўтадиган Олимпиада ўйинларига таклифномаларни Россия, Беларус ва Гватемаладан ташқари 203 та миллий олимпия қўмитасига юборди.
Париждаги Олимпия ўйинлари 2024 йилнинг 26 июлидан 11 августига қадар бўлиб ўтади. Ўйинларнинг тантанали очилиш маросими Сена дарёсида бўлиб ўтади, у бўйлаб миллий терма жамоалар Париж марказидан қайиқларда сузиб ўтади. 600 000 га яқин томошабин қирғоқларни ўраб олиши кутилмоқда. Шу куни 45 минг ҳуқуқ-тартибот идораси ходимлари Франция пойтахти кўчаларида тартибни назорат қилади. Паралимпия ўйинлари 28 августдан 8 сентябргача бўлиб ўтади.
Манба: stadion.uz