Ўзбекистон ҳарбий хизматчилари Россияга кетмоқчи бўлиб шай тургани ҳақидаги хабарлар рад этилди — видео

Мудофаа вазирлиги Ўзбекистон ҳарбий хизматчилари ҳарбий техникаларда Россияга ёрдам бериш учун юборилиши ҳақидаги хабарларга муносабат билдирди.

Аввалроқ, ижтимоий тармоқларда Ўзбекистон ҳарбий хизматчилари ҳарбий техникаларда Россияга ёрдам бериш учун полигон ҳудудида шай бўлиб тургани, аммо вазият ўзгаргани учун боришдан қолдирилгани ҳақида хабарлар тарқалди. Мудофаа вазирлиги Ахборот ва оммавий коммуникациялар департаменти мазкур хабарларга муносабат билдирди.

Қайд этилишича, мазкур хабар ҳақиқатга тўғри келмайди. Тасвирланган видеода шу йилнинг март ойида Чирчиқ шаҳрида бўлиб ўтган Ватанпарварлик фестивалига жалб этилган техникалар акс этган.

Мудофаа доктринасига кўра, Ўзбекистоннинг мудофаа соҳасидаги сиёсати бошқа давлатларнинг ички ишларига аралашмаслик, эҳтимол тутилган низоларни тинч йўл билан ҳал этиш тамойилларига асосланади.