Тошкент вилоятида ариқда оққан икки ёшли қизчани қутқарган 18 ёшли йигитга ноутбук совға қилинди

Қибрай туманида яшовчи 18 ёшли йигитнинг хонадонига ФВБ ва Ёшлар ишлари агентлиги ходимлари миннатдорчилик сўзлари билан келишди.

Аввалроқ, Қибрай туманида икки ёшли қиз катта ариққа тушиб кетгани, уни 18 ёшли Юсуфбек Тожибоев қутқариб қолгани ҳақида хабар бергандик.

Қибрай тумани Фавқулодда вазиятлар бўлими вакиллари Тожибоевга жажжи қизалоқнинг ҳаётини сақлаб қолган жасоратли ҳаракати учун миннатдорчилик билдириб, ташаккурнома ва совға топширди.

Ёш қаҳрамон хонадонига Ёшлар масалалари агентлиги вакиллари ҳам ташриф буюриб, йигитга янги ноутбук совға қилди.