Yunusobod business city’ни қуриш ДУК ходими $300 минг пора билан ушланди — видео

У тадбиркордан мазкур тадбиркорлик марказида кўп қаватли турар-жой қуриш учун рухсатнома олиб беришни ваъда қилган.

ДХХ хабарига кўра, ‘’Yunusobod business city тадбиркорлик марказини қуриш ва эксплуатация қилиш Дирекцияси” давлат унитар корхонаси ходими тадбиркорга пул эвазига мазкур марказда кўп қаватли турар-жой бинолари қуриш учун рухсат берувчи ҳужжатларни расмийлаштириб беришни ваъда қилган. У бунинг эвазига тадбиркордан 300 минг АҚШ доллари олаётган вақтида ДХХ ва Иқтисодий жиноятларга қарши курашиш департаменти ходимлари томонидан ашёвий далиллар билан ушланди.

Аниқланишича, “Yunusobod business city тадбиркорлик марказини қуриш ва эксплуатация қилиш Дирекцияси’’ ва тадбиркор ўртасида тузилган шартномага мувофиқ, марказ ҳудудидаги эски уйларни бузиш ва қурилиш учун жой тайёрлаш мақсадида, муқаддам тадбиркор томонидан Дирекция ҳисобига 22 млрд сўм миқдоридаги инвестиция маблағи ўтказиб берилган.

Аммо, Дирекция ходими турли баҳоналар билан қурилиш бошлашга рухсат берувчи ҳужжатларни расмийлаштиришни ортга сурган ва масалани ижобий ҳал этиб бериш учун пул талаб қилган.

ЖКнинг фирибгарлик (168) ва пора бериш (28,211) моддалари билан жиноят иши қўзғатилиб, қамоққа олиш тарзидаги эҳтиёт чораси қўлланилган.