СамДУ филиалида бетон плитанинг қулаши ҳолати бўйича жиноят иши қўзғатилди

Жиноят иши қурилиш ишларида хавфсизлик қоидаларини бузиш моддаси билан очилган.

4 сентябрь куни Самарқанд давлат университети Каттақўрғон филиали мажлислар залида темир-бетон плита қулаб тушиши оқибатида олти нафар талаба жабрланганди.

Бош прокуратура матбуот котиби Ҳаёт Шамсутдиновнинг UzNews.uz'га маълум қилишича, мазкур ҳолат бўйича ЖКнинг 258-моддаси (тоғ-кон, қурилиш ёки портлатиш ишлари хавфсизлиги қоидаларини бузиш) билан жиноят иши қўзғатилган.

Эслатиб ўтамиз, ишчи гуруҳ ҳодиса ҳолатларини, шунингдек, тузилманинг таъмирдан кейинги ҳолатини ўрганмоқда.