Оғир атлетика. Азимжон Холев Грузиядаги халқаро турнирда муваффақиятли иштирок этди

Жорий йилнинг 20 декабрь куни Тбилиси шаҳрида 3 карра Олимпия ўйинлари ғолиби, айни дамда Грузия оғир атлетика федерацияси президенти ҳисобланган Кахи Кахиашвилига бағишланган «Кахи кубоги» очиқ турнири бўлиб ўтди. Таъкидлаш керакки, ушбу халқаро мусобақа 1994 йилдан буён ўтказиб келинмоқда.

Биз учун аҳамиятлиси, эркаклар ўртасида +109 кг вазн тоифасидаги баҳсларда иштирок этган ҳамюртимиз Азимжон Холев ўз вазн тоифасида 3-ўринни, цинклер тизими бўйича эса 8-ўринни банд этди.

Мусобақа якунида делегациямиз аъзолари Кахи Кахиашвилига Ўзбекистон оғир атлетика федерациясининг махсус эсдалик совғасини топширишди.

Манба: uzwf.uz