Оғир атлетика оламида Осиё қитъасининг нуфузи баланд!
Халқаро оғир атлетика федерацияси Париж — 2024 ёзги Олимпия ўйинларида иштирок этадиган атлетларни эълон қилди.
Унга кўра, Франция пойтахти мезбонлик қиладиган ўйинларда энг кўп иштирокчи Осиё қитъасидан қатнашади – 40 та. Кейинги ўринларда Европа ва Америка қитъаси спортчилари жой олган – 25 та. Африка қитъасига 10 та, Океания минтақасига эса 8 та квота ажратилган.
Париж — 2024 ёзги Олимпия ўйинларининг оғир атлетика дастурига 100 фоизлик квотани фақатгина Хитой терма жамоаси қўлга киритган — 6 та. Бу борада кучли учликдан АҚШ (5 та) ва Венесуэла (5 та) терма жамоалари жой олди. Ўзбекистондан Акбар Жўраев ва Ригина Адашбаева Париж — 2024 ёзги Олимпия ўйинлари йўлланмасига эга чиқишганди.
Эслатиб ўтамиз, Олимпиаданинг оғир атлетика мусобақалари 7-10-август кунлари Париж экспо марказида бўлиб ўтади.