«Бугун Марказий Осиё бутунлай янги минтақадир» — Ўзбекистон президенти матбуот котиби

31 март куни Хўжанд шаҳрида Ўзбекистон, Тожикистон ва Қирғизистон давлат чегараларининг туташ нуқтаси тўғрисидаги шартноманинг имзоланиши «аҳамияти беқиёс воқеа»дир. Бу ҳақда Ўзбекистон президенти матбуот котиби Шерзод Асадов ўзининг Telegram каналида ёзди. «Газета.uz» унинг фикрини тўлиқ келтиради.

---

Хўжандда аҳамияти беқиёс воқеа содир бўлди. Ўзбекистон, Тожикистон ва Қирғизистоннинг мустақил ривожланиш тарихида илк бор уч мамлакат давлат чегараларининг туташ нуқтаси тўғрисидаги шартнома имзоланди.

Ушбу тарихий келишув мамлакатлар тарихида янги саҳифа очиб, «бир асрлик муаммо»га нуқта қўяди ҳамда бутун минтақанинг узоқ муддатли барқарорлиги ва равнақи учун мустаҳкам пойдевор яратади.

Ўн йиллар давомида чегара масалаларининг ҳал этилмагани, айниқса, аҳолиси зич Фарғона водийсида кескинлик ва низолар манбаи бўлиб келди. Бу ҳудудда уч мамлакат фуқаролари ёнма-ён, баъзан бир кўчанинг икки томонида яшаши одатий ҳол.

Тожикистон ва Қирғизистон ўртасидаги чегара шартномаси, шунингдек, бугунги уч томонлама шартноманинг имзоланиши бу вазиятни тубдан ўзгартириб, юзага келиши мумкин бўлган низолар манбаини бартараф этади.

Энди чегаралар узил-кесил белгилангач, мамлакатлар учун савдо-иқтисодий, транспорт, маданий-гуманитар ва экологик ҳамкорликни кенгайтириш учун кенг имкониятлар очилмоқда. Бунинг иқтисодий самараси тез орада ўзини намоён этади.

2017−2018 йилларда Ўзбекистон — Қирғизистон давлат чегаралари тўғрисидаги шартнома, Ўзбекистон, Қозоғистон ва Туркманистон ўртасида давлат чегараларининг туташ нуқтаси тўғрисидаги шартнома, Ўзбекистон ва Тожикистон ўртасида чегара участкалари бўйича шартнома имзоланди.

Бундай келишувларга эришиш Марказий Осиёнинг барча давлатлари етакчиларининг кучли сиёсий иродаси, прагматик ёндашуви, ҳамкорлик ва ўзаро англашувга интилиши туфайли бўлди.

Энг муҳим натижалардан бири — бугунги кунда халқаро ҳамжамият Марказий Осиёга умумий ўзига хосликка ва ўзаро боғлиқ манфаатларга эга яхлит минтақа сифатида қарашни бошлади.

Умуман олганда, юқоридаги тарихий ютуқлар ҳатто энг мураккаб масалаларни ҳам очиқ мулоқот, ҳурмат ва ўзаро ишонч орқали самарали ҳал этиш мумкинлигига ёрқин мисолдир.

Бугун Марказий Осиё бутунлай янги — жипслашган ва кучли, дунёга ва кенг кўламли шериклик учун очиқ минтақадир. Бу, албатта, қувонарлидир!