Алишер Қаюмов Ўзбекистоннинг Янги Зеландиядаги элчиси этиб тайинланди
Бугун, 1 апрель куни Веллингтон шаҳридаги Government House қароргоҳида Ўзбекистон элчиси Алишер Қаюмов Янги Зеландия генерал губернатори Даме Синди Кирога ишонч ёрлиқларини топширди.
Таъкидланишича, Ўзбекистон элчиси Янги Зеландиянинг маори туб аҳолиси анъаналарига хос тарзда тантанали равишда кутиб олинган. Маросимдан сўнг бўлиб ўтган суҳбатда сўнгги йилларда изчил ривожланиб бораётган Ўзбекистон — Янги Зеландия муносабатларининг бугунги ҳолати ва истиқболлари муҳокама қилинган. Хусусан, сиёсий, савдо-иқтисодий, илм-фан ва таълим соҳаларидаги ҳамкорлик масалалари кўриб чиқилган.
Янги Зеландия генерал-губернатори Даме Синди Киро Ўзбекистонда президент Шавкат Мирзиёев раҳбарлигида амалга оширилаётган ислоҳотларни юқори баҳолаган. У давлат бошқаруви тизимини модернизация қилиш, фуқаролик жамиятини ривожлантириш ва инвестиция муҳитини яхшилаш борасидаги натижаларни алоҳида таъкидлаган.
Суҳбат давомида икки мамлакат ўртасидаги дўстона муносабатларни янада мустаҳкамлаш, сиёсий мулоқотни фаоллаштириш, шунингдек савдо-иқтисодий ва маданий-гуманитар соҳаларда ҳамкорликни кенгайтириш муҳимлиги қайд этилган. Шунингдек, Янги Зеландия томони парламентлараро алоқаларни ривожлантириш ва бошқа йўналишлардаги ҳамкорликни давом эттиришга тайёр эканини билдирган.
Учрашув якунида генерал-губернатор Даме Синди Киро икки томонлама муносабатларни янада мустаҳкамлашдан манфаатдор эканини таъкидлаб, Ўзбекистон раҳбарияти ва халқига самимий тилакларини йўллаган.
Эслатиб ўтамиз, Алишер Қаюмов 2024 йилнинг мартида Ўзбекистоннинг Сингапурдаги, 2025 йил ноябрида Австралиядаги элчиси (қароргоҳи Сингапур шаҳрида) сифатида вазифасини бажаришга киришганди. У Ўзбекистоннинг Сингапурдаги (2018−2024) ва Австралияда (2022−2024) ўриндошлик асосидаги элчиси бўлиб ишлаган Қаҳрамон Шокиров ўрнига тайинланган.
56 ёшли дипломат Тошкент давлат университетини (ҳозирги Ўзбекистон Миллий университети) тамомлаган. Узоқ йиллар давомида Ташқи иқтисодий алоқалар вазирлиги тизимида (ҳозирги Инвестициялар, саноат ва савдо вазирлиги) ҳамда Германиядаги элчихонада савдо-иқтисодий масалалар бўйича маслаҳатчи сифатида ишлаган. У элчихона маслаҳатчиси сифатида Австрия ва Венадаги халқаро ташкилотлардаги дипломатик миссияни бошқарган. Хусусий бизнесда, жумладан, хорижда ишлаш тажрибасига эга. Алишер Қаюмов 2017 йилдан буён Германиядаги элчихонада маслаҳатчи лавозимида фаолият юритиб келган.
Ўзбекистон ва Янги Зеландия ўртасидаги дипломатик муносабатлар 1992 йил 11 мартда ўрнатилган. 2019 йил 1 февралда Ўзбекистон Янги Зеландия фуқаролари учун 30 кунлик муддатга визасиз тартибни жорий қилган.