Термизлик фуқаро Украинадаги урушда иштирок этгани учун ёлланмачилик бўйича судланди

Термиз шаҳар жиноят ишлари бўйича суди ёлланмачилик ҳамда Ўзбекистон фуқароларини чет давлат ҳарбий хизматига ёллашда айбланган 30 ёшли фуқарога нисбатан ҳукм чиқарди.

Суд материалларига кўра, мазкур шахс 2022 йилда ишлаш мақсадида Россияга бориб, Москва вилоятидаги нон ишлаб чиқариш цехида меҳнат қилган. Кейинчалик у гиёҳвандликка оид жиноят бўйича қўлга олиниб, Россия суди томонидан тўққиз йил озодликдан маҳрум қилиш жазосига ҳукм қилинган.

Судланувчининг айтишича, жазони ўташ давомида унга Россия Мудофаа вазирлиги билан шартнома имзолаш учун босим ўтказилган. 2025 йил август ойида у шартнома имзолаб, бошқа маҳкумлар билан бирга Нижний Новгород шаҳрида ҳарбий тайёргарликдан ўтган.

Шундан сўнг у жанг ҳаракатлари ҳудудига юборилган. Унинг таъкидлашича, фронт чизиғидаги ҳарбийларга озиқ-овқат етказиб бериш билан шуғулланган. 2025 йил ноябрь ойида навбатдаги сафарлардан бири чоғида дронлар ҳужумига учраб, қўл ва оёқларидан жароҳат олган. Ҳамхизматларидан бири ҳалок бўлган.

Луганск шаҳридаги госпиталда даволанганидан кейин у яна ҳарбий полигонга юборилган. Бироқ соғлиғи ёмонлашгани сабабли Белгороддаги госпиталга олиб кетилаётган вақтда қочиб кетиб, Москвага етиб борган. Кейинчалик Ўзбекистон консуллиги кўмагида ватанга қайтишга муваффақ бўлган.

Судланувчи, шунингдек, ваъда қилинган пул тўловлари ва Россия фуқаролигини олмаганини билдирган.

Суд унинг тан жароҳатлари олгани, муқаддам судланмагани ҳамда оиланинг ягона боқувчиси эканини инобатга олди.

Суд унинг ҳаракатларини ёлланмачилик ва Ўзбекистон фуқароларини чет давлатлар ҳарбий хизматига жалб қилишга оид моддалар бўйича квалификация қилди ва 4 йил 6 ой муддатга озодликни чеклаш жазосини тайинлади.

Ҳукмга кўра, фуқаро фақат ишлаш ва даволаниш мақсадидагина уйидан чиқиши мумкин. Шунингдек, унга Сурхондарё вилояти ҳудудидан ташқарига чиқиш тақиқланди.