Ўзбекистонда 18 июль куни иссиқлик энг юқори чўққига чиқади: ҳаво +48° гача қизийди

18 июль куни Ўзбекистонда аномал иссиқлик ўзининг энг юқори даражасига етади. «Ўзгидромет» маълумотига кўра, республика ҳудуди бўйлаб қуруқ ва жуда иссиқ об-ҳаво сақланиб қолади, ёғингарчилик кутилмайди. Айрим ҳудудларда ҳаво ҳарорати +48° гача кўтарилиши мумкин.

Тошкент шаҳрида кам булутли, ёғингарчиликсиз об-ҳаво кузатилади. Шарқий шамол секундига 3–8 метр тезликда эсади. Кечаси ҳаво ҳарорати +26…+28°, кундузи эса +43…+45° бўлади.

Энг юқори ҳарорат Бухоро, Навоий, Қашқадарё ва Сурхондарё вилоятларида кузатилиб, ҳаво +43…+48° гача қизийди. Бухоро ва Навоий вилоятларининг чўл ҳудудларида кечаси ҳам ҳаво ҳарорати айрим жойларда +33…+35° дан пастга тушмайди.

Қорақалпоғистон Республикаси ва Хоразм вилоятида кундузи ҳаво +40…+45° гача исийди. Тошкент, Самарқанд, Жиззах ва Сирдарё вилоятларида ҳарорат +40…+45°, Андижон, Наманган ва Фарғона вилоятларида эса +38…+43° атрофида бўлади.

Республиканинг кўплаб ҳудудларида шарқий шамол секундига 7–14 метр тезликда эсади. Айрим жойларда шамол кучайиши ва чанг-тўзон кузатилиши мумкин.

Тоғли ҳудудларда ҳам қуруқ, ёғингарчиликсиз об-ҳаво сақланади. Ҳаво ҳарорати кечаси +17…+22°, кундузи эса +31…+36° бўлади.

Синоптиклар аҳолига куннинг энг иссиқ вақтларида очиқ қуёш остида узоқ вақт қолмаслик, етарли миқдорда суюқлик истеъмол қилиш ҳамда имконият бўлса, очиқ ҳавода узоқ давом этадиган жисмоний фаолликдан тийилишни тавсия этмоқда.