FIDE рейтинги янгиланди. Синдаров ўз ўрнида, Абдусатторовда пасайиш кузатилди

Халқаро шахмат федерацияси (FIDE) 2026 йил июль ойи якунларига кўра дунёнинг энг кучли шахматчилари рўйхатини янгилади. Кучли 100 талик рўйхатда Ўзбекистондан 5 нафар гроссмейстер ўрин олди.

Рейтингда ҳамон Магнус Карлсен (2823) пешқадамлик қилмоқда. Иккинчи ва учинчи ўринларни АҚШ вакиллари Фабиано Каруана (2792) ҳамда Ҳикару Накамура (2792) эгаллаб турибди.

Ўзбекистонлик шахматчиларнинг натижалари:

Ўзбекистоннинг биринчи рақамли шахматчиси бўлиб турган Жавоҳир Синдаров 2777 очко билан Жаҳон рейтингида 4-ўринни банд этиб турибди. Ўзбекистоннинг иккинчи рақамли шахматчиси Нодирбек Абдусатторовнинг ҳисобида эса 2762 очко мавжуд бўлиб, у FIDE рейтингида 8-поғонадан жой олди.

Кучли 100 таликдан яна уч нафар ўзбекистонлик гроссмейстер ўрин олган:

Нодирбек Ёқуббоев — 2685 очко (39-ўрин);
Рустам Қосимжонов — 2665 очко (52-ўрин);
Шамсиддин Воҳидов — 2655 очко (61-ўрин).

Аёллар ўртасидаги Топ — 100 таликда ҳам сезиларли ижобий ўзгаришлар кузатилди. Ўзбекистоннинг биринчи рақамли шахматчиси Афруза Ҳамдамова ўз очколарини 2440 тага етказиб, 26-ўринга кўтарилди. Гулруҳбегим Тоҳиржонова эса 2355 очко билан 82-ўринни банд этди.

Манба: daryo.uz