US Open. Камилла Раҳимова дунёнинг биринчи рақамли теннисчисига мағлуб бўлди
Беллашув Сабаленка фойдасига 6:3, 6:4 ҳисобида якунланди. Амалдаги чемпион кейинги босқичда россиялик Диана Шнайдер ва америкалик Тейлор Таунсенд ўртасидаги учрашув ғолибига қарши кортга чиқади.
Сабаленка учун бу US Open’даги кетма-кет 16-ғалаба бўлди. У ушбу турнирда сўнгги марта 2023 йилги финалда америкалик Коко Гауффга қарши учрашувда мағлуб бўлган. Шундан сўнг Сабаленка икки марта турнир чемпионига айланди. 2025 йилда беларуслик теннисчи Маркета Вондроушова унга қарши баҳсда иштирок этишдан бош тортгани сабабли ярим финалга йўлланма олган ва шу сабабли мазкур учрашув ғалабалар сериясига киритилмайди.
28 ёшли Сабаленка 2024 йил октябрьидан буён WTA рейтингида пешқадамлик қилмоқда. У ташкилот тасарруфидаги яккалик баҳсларида 24 та титулни қўлга киритган. “Катта дубулға” турнирларида эса беларуслик теннисчи тўрт марта ғолиб чиққан: Австралия очиқ чемпионатида 2023 ва 2024 йилларда, US Open’да эса 2024 ва 2025 йилларда. Жуфтлик баҳсларида Сабаленка 2019 йилда US Open, 2021 йилда эса Австралия очиқ чемпионатида ғолиб бўлган.
25 ёшли Раҳимова жаҳон рейтингида 92-ўринни эгаллаб турибди. “Катта дубулға” турнирларида эса унинг энг яхши натижаси учинчи босқич ҳисобланади.
US Open мавсумдаги “Катта дубулға” туркумига кирувчи сўнгги турнир ҳисобланади. Мусобақа 13 сентябрь куни якунланади. Турнирнинг умумий мукофот жамғармаси 108 миллион долларни ташкил этади.
Манба: daryo.uz