Алишер Самадов Ҳисоб палатаси раиси лавозимига тайинланди

Алишер Бахадирович Самадов Ўзбекистон Ҳисоб палатаси раиси лавозимига тайинланди, дея хабар бермоқда президент матбуот хизмати.

У 2025 йил 14 июль кунидан буён Президент администрацияси Ҳуқуқий экспертиза ва комплекс таҳлил қилиш департаменти бошлиғи лавозимида ишлаб келаётганди. Бундан аввал президентнинг ҳуқуқий экспертиза ва комплекс таҳлил қилиш масалалари бўйича маслаҳатчиси ўринбосари бўлган.

Тимур Нурйигитович Бутунбаев эса Президент администрацияси раҳбарининг сув ислоҳотлари бўйича ўринбосари — Ҳуқуқий экспертиза департаменти бошлиғи лавозимига тайинланди.

Тимур Бутунбаев

Бунгача Бутунбаев Президент администрацияси раҳбарининг сув таъминоти тизимини ислоҳ қилиш бўйича ўринбосари эди.

2025 йил январь ойидан бери Ҳисоб палатаси раиси лавозими вакант бўлиб қолаётган эди. Бунгача унга кейинчалик Самарқанд вилояти ҳокими бўлган Адиз Бобоев раҳбарлик қилган.

Ўтган йилнинг июнь ойида Президент администрациясининг Назорат инспекцияси тугатилиб, унинг ваколатлари Ҳисоб палатасига ўтказилган эди.