«Адолат» партияси Робахон Маҳмудовани президентликка номзод сифатида кўрсатади
9 июлга белгиланган навбатдан ташқари президентлик сайловлари учун учинчи номзод номи маълум бўлди. «Янги Ўзбекистон» газетасининг Telegram каналида маълум қилинишича, «Адолат» социал-демократик партияси номзод кўрсатиш бўйича бўлажак қурултойда кўриб чиқиш учун Робахон Анваровна Маҳмудова номзодини маъқуллади.
Робахон Маҳмудова 2020 йил июль ойидан буён Ўзбекистон Олий суди раисининг биринчи ўринбосари — Маъмурий ишлар бўйича судлов ҳайъати раиси лавозимида ишлаб келмоқда.
У 1958 йилда Фарғона шаҳрида туғилган, бунгача Жиноят ишлари бўйича Фарғона вилояти суди раиси, Ўзбекистон президентининг Фарғона вилоятидаги Халқ қабулхонаси мудири лавозимларида ишлаган. У Сенатнинг Фан, таълим ва соғлиқни сақлаш масалалари қўмитаси раиси бўлган.
Бунгача Халқ демократик партиясидан партия раиси Улуғбек Иноятов, Экологик партиядан эса раҳбар Абдушукур Хамзаев президентликка номзод сифатида кўрсатилганди.