Антикоррупция агентлиги раҳбари унга 1,5 млн долларлик уй совға қилингани ҳақидаги хабарни рад этди

Ўзбекистон Коррупцияга қарши курашиш агентлиги директори Акмал Бурханов қайнотаси унга 1,5 млн долларга уй олиб бергани ҳақидаги хабарни ёлғон деб атади. «[Бу ҳақдаги хабарни] қайнотамга юбориб қўйдим», — дея ҳазил қилди у Twitter`да.

Ўзбекистон Коррупцияга қарши курашиш агентлиги директори Акмал Бурханов қайнотаси унга 1,5 миллион долларлик уй совға қилгани ҳақидаги хабарни ёлғон деб атади.

«Бу ёлғон хабар! Шундай бўлса-да, қайнотамга юбориб қўйдим», — дея ёзган Бурханов твитига кулиб турган смайлик қўшиб қўйди.

Тарқалган хабарларда айтилишича, Тошкентдаги икки қаватли уйнинг ертўласи ва лифти бўлиб, унда уч нафар ишчи хизмат қилади.

Апрель ойида Коррупцияга қарши курашиш агентлиги агентлик раҳбарияти томонидан олинган совғалар реестрини эълон қилганди. Унга кўра, шу вақтгача қиймати 14 млн 570 минг сўмлик 8 та совға агентликка ҳадя қилинган. Уларнинг барчасини ташкилот директори Акмал Бурханов қабул қилган. Совғалар айни пайтда агентлик музейида сақланмоқда.