Тошкентда кўпхотинликни тарғиб қилган блогерчи аёл устидан суд бўлиб ўтган. Видео

15 август куни Тошкентда Chechenka0909 тахаллуси билан танилган инстаграм-блогерчи аёлга нисбатан суд мажлиси ўтказилган. У кўпхотинликни тарғиб қилишда айбланган. Бу ҳақда зўравонликка қарши Nemolchi.Uz. лойиҳаси маълумотларига таянган ҳолда мухбиримиз хабар бермоқда.

Маълум бўлишича, аёл турмуш қурган, икки фарзанди бор ва учинчи фарзандига ҳомиладор экан. Судда аниқланишича, аёл Ўзбекистонда кўпхотинлик тақиқланганлигини билган ҳолда, 9 август куни видео тайёрлаган ва уни Инстаграмда тарқатган. Видеода аёл эрининг туғилган кунида унга иккинчи хотинни «совға қилган».

Блогерчи аёлнинг судда таъкидлашича, видео ҳазил тариқасида суратга олинган бўлиб, айни пайтда у қилмишидан пушаймон. Аёл қарамоғида икки нафар вояга етмаган фарзанди борлиги ва учинчи боласига ҳомиладор эканини айтиб, жазони юмшатишни сўраган.

Суд уни айбдор деб топган. Бироқ, икки нафар вояга етмаган фарзанди борлиги ва илгари ушбу тоифага мансуб ҳуқуқбузарлик содир этмаганлиги инобатга олиниб, унга огоҳлантириш берилган.

Акс ҳолда у БҲМнинг 60 бараваридан 80 бараваригача ( 19.8 миллион сўмдан 26.4 миллион сўмгача) жарима тўлаши лозим бўларди.