Андижон вилоятида гуруҳ бўлиб зўрлашда гумон қилинаётган эркак қидирилмоқда

Андижон вилоятида гуруҳ бўлиб зўрлаш, талончилик, автомобиль ўғирлаш ва бошқа бир қатор жиноятларни содир этишда гумон қилинаётган эркак қидирилмоқда. Бу ҳақда зўравонликка қарши Nemolchi.Uz. лойиҳаси маълумотлари асосида мухбиримиз хабар бермоқда.

22 июл куни Андижон вилояти Бўстон тумани тергов органлари 2000 йилда Шаҳрихон туманида туғилган Оятилло Маликжоновни қидирувга берган.

У Жиноят кодексининг 118-моддаси 2-қисмининг «б», «г» бандларида (зўрлаш), 119-моддасининг 2-қисмининг «б», «г» бандларида (жинсий эҳтиёжни ғайритабиий шаклда мажбуран қондириш), 164-моддасининг 2-қисмининг «б» бандида (талончилик), "267-модданинг 2-қисми «б» бандида (транспорт воситасини ўғирлаш), 277-моддаси 2-қисмининг «б» бандида (безорилик) кўрсатилган жиноятларни содир этишда гумонланмоқда.

2023 йил 7 май куни Маликжонов бир гуруҳ бошқа шахслар билан бирга эркак ва бир аёл ўтирган машинага бориб, зўравонлик қўллаш билан таҳдид қилиб, улардан жами 4,1 миллион сўмлик моддий бойликларни (магнитофон, флешка, кўзойнак, нақд пул) тортиб олган. Кейин гуруҳдан тўрт киши, шу жумладан Маликжонов, аёлни калтаклашган ва уни ўлдириш билан таҳдид қилиб, мажбуран далага олиб чиқишган ва уни зўрлашган.

Жабрланганлар қочишга муваффақ бўлишган, шундан сўнг ҳужумчилар қаровсиз қолган машинани ўғирлашган, кейин эса уларни ИИБ ходимлари тўхтатган. Гумонланувчилар ҳибсга олинган, аммо Маликжонов терговдан қочиб кетган ва айни пайтда қидирувга берилган

Агар гумонланувчининг қаердалиги ҳақида бирор маълумотга эга бўлсангиз, 102 ёки 1102 рақамига қўнғироқ қилиш сўралади.