Labo ҳайдовчиси юкни байроқ билан қоплаган ҳолда ташиган. Энди уни жазо кутмоқда

Андижон вилоятида Labo автомобили ҳайдовчиси юкни Ўзбекистон байроғи билан қоплаган ҳолда ташиган. Вилоят ҳокимлиги буни давлат рамзига ҳурматсизлик деб атаган. Бу ҳақда мухбиримиз хабар бермоқда.

Ижтимоий тармоқларда юк олиб кетаётган Labo автомобили акс этган фотосурат тарқалган. Автомобиль ҳайдовчиси юкхонани ёпиш учун давлат байроғи тасвирланган матодан фойдаланган.

Ҳайдовчининг шахси аниқланган. У Андижон вилояти Шаҳрихон туманида яшовчи эркак экан. ИИБ билан биргаликда ҳайдовчига нисбатан тегишли чоралар кўрилмоқда.

Вилоят ҳокимлиги давлат рамзларига нисбатан ҳурматсизлик ноқонуний ва ижтимоий хавфли ҳаракат деб ҳисобланишини эслатмоқда.