Нодирбек Абдусатторов Загребдаги нуфузли турнирда блиц баҳслари ғолиби бўлди
Мусобақада Ўзбекистон шарафини ҳимоя қилган Нодирбек Абдусатторов блиц баҳсларида биринчи, умумий ҳисобда эса 2-ўринни эгаллади.
Турнирда Абдусатторов билан бир қаторда Франция вакиллари Алиреза Фирузжа ва Максим Ваше-Лаграв, Ҳиндистон гроссмейстерлари Рамешбабу Праггнанандҳа ҳамда Гукеш Доммаражу, Нидерландиядан Аниш Гири ва Йорден ван Фореест, Германиядан Винсент Кеймер, Руминиядан Богдан-Даниэль Дик ҳамда мезбон Хорватия вакили Иван Шарич иштирок этди.
Grand Chess Tour тақвимидан ўрин олган мусобақанинг рапид йўналишида Алиреза Фирузжа 12 очко билан чемпионликни қўлга киритди. Худди шунча очко жамғарган Рамешбабу Праггнанандҳа қўшимча кўрсаткичларга кўра иккинчи ўринни эгаллаган бўлса, Максим Ваше-Лаграв 11 очко билан кучли учликни якунлади.
Блиц баҳсларида эса Нодирбек Абдусатторов ёрқин ўйин намойиш этди. 18 тур давомида 12,5 очко тўплаган ўзбекистонлик гроссмейстер блиц йўналишида тенгсиз эканини исботлади. Иккинчи ўрин 11,5 очко билан Алиреза Фирузжага насиб этган бўлса, Максим Ваше-Лаграв 10,5 очко билан учинчи поғонани банд этди.
Турнирнинг умумий якунларига кўра, Нодирбек Абдусатторов ва Алиреза Фирузжа 24 очкодан жамғариб, биринчи ўрин учун тай-брейк баҳсида тўқнаш келди. Дастлабки икки тай-брейк партияси дуранг билан якунлангач, ғолиб армагеддон форматида аниқланди.
Армагеддон қоидаларига кўра, оқ доналарда ўйнаган шахматчига 5 дақиқа, қора доналарда ҳаракат қилган иштирокчига эса 4 дақиқа вақт берилди. Шунингдек, 61-юришдан бошлаб ҳар бир юриш учун 2 сониядан қўшимча вақт қўшилди.
Қуръа натижасига кўра, Алиреза Фирузжа қора доналарда ўйнади ва дуранг натижа қайд этиш орқали турнирнинг умумий ғолибига айланди. Франциялик гроссмейстер бунинг эвазига 47,5 минг АҚШ доллари миқдоридаги бош мукофотни қўлга киритди.
Нодирбек Абдусатторов эса мусобақани иккинчи ўринда якунлаб, 42,5 минг АҚШ доллари миқдоридаги мукофот пулига сазовор бўлди.
