Американинг Геронтологик тадқиқот гуруҳи ва “LongeviQuest” маълумотларига кўра, Лукаснинг вафотидан сўнг суперузоқ умр кўрган инсон мақоми Англиянинг Суррай графлигидан бўлган 115 ёшли Этель Катерхэмга ўтган.

“LongeviQuest”нинг ёзишича, Лукас ўзининг 110 ёшини нишонлаганида Рим папаси Францискдан шахсан дуо олган. Қайд этиш жоиз, Франциск 21 апрель куни 88 ёшида вафот этиб, ўтган дам олиш кунлари дафн қилинди.

Геронтологик тадқиқот гуруҳи раҳбари Роберт Янгнинг сўзларига кўра, Ина Лукас ўз туғилган санасини 1908 йил 27 май деб ҳисоблаган, бироқ ҳужжатлар бўйича унинг туғилган куни 8 июнь ҳисобланади.

Геронтологларнинг маълумотларига кўра, у Бразилиянинг жанубидаги Риу-Гранди-ду-Сул штатида туғилган. У машҳур бразилиялик генерал Давид Канабарронинг невараси бўлган. Отаси 1923 йилда жангда ҳалок бўлган. Ёшлигида соғлиғи заиф бўлгани боис унинг яшаб қолиши борасида хавотирлар бўлган.

1928 йилда Лукас Уругвай пойтахти Монтевидеога кўчиб ўтиб, у ерда роҳиба бўлган, икки йилдан сўнг эса Бразилияга қайтиб, Рио-де-Жанейрода португал тили ва математикадан дарс бера бошлаган.

2021 йил январида, 112 ёшида у коронавирусга қарши биринчи вакцина дозасини олган, 2022 йил октябрда эса шифохонада бўлганида COVID — 19 билан касалланган, аммо бир ой ичида соғайган. Шу тариқа, у бу касалликни енгиб ўтган дунёдаги энг ёши катта инсонлардан бирига айланган.