Япония Ўзбекистон билан ҳарбий йўналишдаги ҳамкорликни кўриб чиқмоқда
Япония Ташқи ишлар вазири Такеши Иваянинг Ўзбекистонга ташрифи давомида икки томонлама алоқаларни ҳарбий ва хавфсизлик йўналишида чуқурлаштириш эҳтимоли муҳокама қилинди. Ташриф доирасида вазир Бахтиёр Саидов билан 16 банддан иборат қўшма баёнот имзоланди ва томонлар стратегик даражадаги мулоқотни йўлга қўйгани эътироф этилди.
Япония ТИВ матбуот котиби Китамура Тошихирога кўра, Токио Ўзбекистон билан мудофаа соҳасида қандай ҳамкорлик қилиш мумкинлигини ўрганмоқда. Ҳарбий машғулотлар ҳозирча Ўзбекистоннинг географик ҳолати сабабли қийин бўлса-да, бошқа йўналишларда музокаралар олиб борилиши режалаштирилган.
“Ҳар қандай ҳарбий ҳамкорлик мунтазам муҳокама ва аниқликни талаб қилади. Ўзбекистон билан ҳам бу борада ҳамкорлик бўлиши учун аввало аниқ мақсадларни билишимиз керак”, — дейди Китамура.
Қўшма баёнотда терроризм, экстремизм, наркотик савдоси ва халқаро таҳдидларга қарши курашда икки давлат биргаликда ҳаракат қилишга келишиб олгани қайд этилган.