Оғир атлетика. Акбар Жўраев тўрт карра жаҳон чемпионига айланди

Оғир атлетика бўйича Ўзбекистон терма жамоаси аъзоси Акбар Жўраев Хитойнинг Нинбо шаҳрида якунланиб бораётган жаҳон чемпионатида олтин медални қўлга киритди. Ҳамюртимиз — 110 кг вазн тоифасида иштирок этиб, тўртинчи бор дунёда тенгсиз эканини исботлади.

Даст кўтариш баҳсида 198 кг билан жаҳон рекордини янгилаган Акбар, силтаб кўтаришда ҳам феноменал натижа қайд этди. Иккинчи уринишида 234 кг тошни ўзига бўйсундирган ҳамюртимиз икки курашда 432 кг натижа билан биринчи ўринни эгаллаб, мутлақ чемпионликка эришди. Унинг икки курашдаги 432 кг натижаси мазкур йўналишдаги янги жаҳон рекорди бўлди.

Мазкур жаҳон чемпионати Лос-Анжелес — 2028 ёзги Олимпия ўйинлари учун қимматли рейтинг очколарини тақдим этиши билан янада аҳамиятли эди. Ҳамюртимиз 2 та жаҳон рекордини ўрнатгани учун қўшимча бонус очколарига ҳам эга бўлмоқда.

Баракалла, Акбар!

Манба: stadion.uz