Нукус аэропорти фаолиятига чеклов ўрнатилди

Қорақалпоғистондаги фавқулодда ҳолат сабабли ўрнатилган комендантлик соатларида Нукус аэропортининг фаолияти вақтинча чекланади. Шу боис якшанба куни қолдирилган рейс йўловчилари душанба куни кундузи манзилига етказилиши маълум қилинди.

«Нукус» аэропорти фаолияти комендантлик вақтида чекланади, деб хабар берди «Uzbekistan Airports».

«Қорақалпоғистонда фавқулодда ҳолат жорий этилиши ва президент қарори ижросини таминлаш мақсадида „Нукус“ аэропорти фаолияти комендантлик соатларида вақтинчалик соат 21:00 дан 07:00 гача чекланади», — дейилади хабарда.

Шу муносабат билан «Uzbekistan Airways» АЖнинг 2022 йил 3 июль куни Тошкент — Нукус — Тошкент йўналиши бўйича HY017/HY018 рейслари бекор қилинди.

Рейси бекор бўлган йўловчилар манзилига 4 июль куни етказилади. Авиакомпания йўловчиларни рейслар кечиктирилиши ҳақида хабардор қилганини маълум қилди.

Аввалроқ, «Газета.uz» мухбири Шухрат Латипов намойишлардан кейинги Нукус шаҳри ҳақида фоторепортаж тайёрлаганди.