100 нафар ишбилармон янги таъсис этилган «Фаол тадбиркор» кўкрак нишони билан тақдирланди

Президент қарори билан «Фаол тадбиркор» кўкрак нишони таъсис этилди. Шавкат Мирзиёев ишбилармон доира вакиллари билан очиқ мулоқот олдидан 100 нафар тадбиркорни мазкур мукофот билан тақдирлади.

Ўзбекистон президенти 19 августдаги «Фаол тадбиркор» кўкрак нишонини таъсис этиш тўғрисидаги қарорга имзо чекди.

Ушбу кўкрак нишони билан мамлакатда тадбиркорликни ривожлантириш, иш ўринларини яратиш, инновациялар жорий қилиш, солиқларни ўз вақтида тўлаш, маҳсулот ва хизматларни экспорт қилиш, етук мутахассислар тайёрлаш ҳамда бизнесдаги муваффақиятлари ва ижтимоий фаоллиги билан барчага намуна бўлаётган тадбиркорлар тақдирланади.

«Фаол тадбиркор» кўкрак нишони ҳар йили 20 август — Тадбиркорлар куни арафасида Ўзбекистон Республикаси президенти ёки унинг номидан Сенат раиси, Қонунчилик палатаси Спикери, президент Администрацияси раҳбари, бош вазир, вазирлик, идора ва жамоат бирлашмаларининг республика органлари раҳбарлари, Қорақалпоғистон Республикаси Жўқорғи Кенгеси раиси, вилоятлар ва Тошкент шаҳар ҳокимлари, шунингдек, бунга вакил қилинган бошқа шахслар томонидан тантанали вазиятда топширилади.

«Газета.uz»да реклама

«Фаол тадбиркор» кўкрак нишони билан тақдирланган шахслар ҳақида ҳар йили «Йилнинг илғор тадбиркорлари» китоби чоп этиб борилади.

Шу муносабат билан Шавкат Мирзиёев бу йилги тадбиркорлар мулоқоти олдидан ҳудудлардан 6−8 нафардан, Тошкент шаҳридан эса 16 нафар, умумий ҳисобда 100 нафар тадбиркорни кўкрак нишони билан тақдирлади.

Мукофотланганларнинг тўлиқ рўйхати.