[ siyosat ] 31 Yanvar 2023

Фоторепортаж: Қорақалпоғистон воқеалари бўйича ҳукмлар эълон қилинди

Суд Нукус воқеалари бўйича жиноят ишини кўриб чиқишни якунлаб, 22 нафар судланувчига ҳукм эълон қилди. Айбланувчиларнинг айримлари дуога қўл очган бўлса, яқинлари кўз ёшларини тия олмади, ҳукм эълон қилинганидан кейин маҳкумлардан бирининг онаси ҳушини йўқотди. «Газета.uz» фоторепортажи.

31 январь куни Жиноят иши Қорақалпоғистон судининг жиноят ишлари бўйича судлов ҳайъати судьяси Елубай Абибуллаев раислигида биринчи инстанция суди кўриб чиқилди ва 22 нафар судланувчига ҳукм эълон қилинди. «Газета.uz» мухбирлари суд якунларидан фоторепортаж тайёрлади.

Жараён олиб борилган Бухоро вилояти суди кириш қисми.

Бу иш бўйича суд жараёни 28 ноябрь куни бошланган бўлиб, икки ойдан сал кўпроқ давом этди.

«Газета.uz»да реклама

Якунда судланувчиларнинг яқинлари ва қариндошлари, Қорақалпоғистондаги воқеаларни мустақил текшириш бўйича парламент комиссияси аъзолари, оммавий ахборот воситалари вакиллари, кузатувчилар, БМТнинг Марказий Осиёдаги инсон ҳуқуқлари бўйича минтақавий бошқармаси вакили Фабио Пиана ва бошқалар иштирок этди.

Судланувчилар ҳукмни кутар экан, улардан баъзилари дуо ўқиди, бошқалари қариндошлари билан мулоқот қилди, яна айримлари эса кўз ёшларини тийиб туролмади.

Судланувчиларнинг яқинлари ва қариндошлари ҳам ҳукм эълон қилинишидан олдин ва кейин кўз ёшларини тия олмади. 8 йилга озодликдан маҳрум этилган Разбек Бекмуратовнинг онаси ҳушини йўқотди.

Намойишларнинг асосий иштирокчиси Даулетмурат Тажимуратов 16 йилга қамалган бўлса, журналист Лолагул Каллиханова 3 йил муддатга шартли равишда озод қилинди. Азамат Нуратдинов, Ахмет Сметуллаев ва Азамат Турданов ҳам (учаласининг ҳам озодлиги 5 йилга чекланди — уй қамоғи), суд залидан озод этилди. Залда уларнинг озод этилиши қарсаклар билан кутиб олинди.