Имзолар камлиги сабаб «Ҳақиқат, тараққиёт ва бирдамлик» партиясини рўйхатдан ўтказиш рад этилди — Адлия вазирлиги

Адлия вазирлиги янги — «Ҳақиқат, тараққиёт ва бирдамлик» партиясини рўйхатдан ўтказиш имзолар етарли бўлмагани сабабли рад этилганини билдирди. Партияга бирлашмоқчи бўлган фуқаролар рўйхатига вафот этганлар, вояга етмаганлар ва хорижда яшаётганларнинг ҳам имзолари киритилгани маълум бўлди.

Имзолар етарли бўлмаганлиги сабабли «Ҳақиқат, тараққиёт ва бирдамлик» партиясини рўйхатдан ўтказиш рад этилди, дея хабар бермоқда Адлия вазирлиги матбуот хизмати.

Маълум қилинишича, вазирликка 15 май куни партияни рўйхатга олиш ҳақидаги ариза келиб тушган. «Сиёсий партиялар тўғрисида»ги қонуннинг 6-моддасига кўра, сиёсий партияни тузиш учун камида 8 та ҳудудий субъектда (вилоятда), шу жумладан Қорақалпоғистон Республикаси ва Тошкент шаҳрида яшаётган ҳамда партияга бирлашиш истагида бўлган камида 20 минг фуқаронинг имзоси бўлиши талаб этилади.

Бироқ янги партияни рўйхатдан ўтказиш учун тақдим этилган ҳужжатларда ушбу партияга бирлашиш истагини билдирган фуқароларнинг 10 777 та имзоси келтирилган.

«Газета.uz»да реклама

Бунда ҳужжатларни ўрганиш жараёнида партияга бирлашиш истагини билдирган фуқаролар рўйхатига қуйидагилар киритилгани маълум бўлган:

• сиёсий партия таъсис конференцияси ўтказилгунгача вафот этган 145 нафар шахс;
• 23 нафар вояга етмаган шахс;
• маҳаллаларни асфальтлаш, коммуникация тизимларини янгилашга маблағ олиш мақсадида «Очиқ бюджет» лойиҳасига овоз бериш учун деб хато имзо қўйган ва кейинчалик ушбу имзоларини қайтариб олган 3900 нафар шахс;
• шахсга доир маълумотлар тақдим этилмагани сабабли шахси аниқланмаган 1775 нафар шахс;
• имзолари қонунчилик ҳужжатларида назарда тутилмаган электрон шаклда олинган 2257 нафар шахс;
• партия тузиш учун хоҳиш билдирмаган ва ҳеч қандай имзо қўймаган 844 нафар шахс;
• суд тартибида муомалага лаёқатсиз деб топилган 185 нафар шахс;
• Ўзбекистонда яшамаётган 209 нафар шахс.

Натижада ҳақиқатда партияга аъзо бўлиш истагини билдирган фуқароларнинг 1439 та имзоси мавжуд эканлиги аниқланган.

Ариза ва тақдим этилган таъсис ҳужжатларини кўриб чиқиш натижасига кўра, 15 июнь куни вазирлик томонидан «Ҳақиқат, тараққиёт ва бирдамлик» партиясини қатор асослар бўйича рўйхатга олишни рад этиш тўғрисида қарор қабул қилинган.

Вазирлик сиёсий партияни рўйхатга олишни рад этиш устидан Олий судга белгиланган тартибда шикоят қилиш мумкинлигини эслатиб ўтди.

Май ойи охирида «Ҳақиқат, тараққиёт ва бирдамлик» партияси раҳбари Хидирназар Аллақулов Андижонда калтакланган бўлиши мумкинлиги хабар қилинганди. Партияни рўйхатдан ўтказиш учун овозларни йиғиш жараёнида бир гуруҳ эркак ва аёллар пайдо бўлиб, жанжал уюштиришган. Андижон вилоят ИИБ воқеа ўрганилаётганини билдирган.

Июнь ойи бошида эса Фарғона вилоят ИИБ имзо тўплаётган партия раҳбари Хидирназар Аллақулов қўлга олинганини маълум қилган. ИИБ унинг тарафдорлари билан талабларга бўйсунмай, можаро уюштиргани, икки ходимга тан жароҳати етказганини иддао қилган. Аллақулов тарафдорлари эса провокация бўлганини айтган.