Тошкентда «ОЧИҚ ҚАДАМ» инклюзив лойиҳасининг таълим босқичи якунланди
Тошкентда ногиронлиги бўлган шахсларни рақамли муҳитга жалб этишга қаратилган «ОЧИҚ ҚАДАМ» махсус инклюзив лойиҳасининг биринчи — таълим босқичи якунланди. Ташаббус Ўзбекистон Маданият ва санъатни ривожлантириш жамғармаси ҳамда FOCUS кинематография ва театр санъати мактаби ҳамкорлигида амалга оширилди.
Лойиҳа ногиронлиги бўлган шахсларнинг рақамли контент яратиш ва мобилография соҳасидаги ижодий салоҳиятини ривожлантиришга қаратилган. Ташаббус 2021 йилда Ўзбекистон томонидан ратификация қилинган БМТнинг Ногиронлар ҳуқуқлари тўғрисидаги конвенцияси доирасидаги мажбуриятларни амалга оширишга хизмат қилади.
Жадал ўқув дастурида 18 ёшдан 45 ёшгача бўлган 33 нафар иштирокчи қатнашди. Улар орасида эшитиш, кўриш, таянч-ҳаракат тизими ва ментал имконияти чекланган шахслар бор. Машғулотлар Республика болалар кутубхонасида ўтказилди.
Курс доирасида иштирокчилар мобилография, кадр композицияси, ёритиш, блог юритиш, ижтимоий тармоқларда аудитория билан мулоқот қилиш, монетизация ва танқид билан ишлаш каби йўналишларда амалий билимларга эга бўлди. Шунингдек, дастурга актёрлик маҳорати, дикция, нутқ билан ишлаш ва психологик тўсиқларни енгиш бўйича машқлар ҳам киритилди. Дарслар ўзбек ва рус тилларида, сурдотаржима ёрдамида олиб борилди.
Ташкилотчилар иштирокчилар учун қулай шароит яратди: биринчи гуруҳ учун транспорт хизмати ташкил этилди, барча учрашувларда эса сурдотаржимонлар иштирок этди.
FOCUS мактаби раҳбари Мария Мусакованинг таъкидлашича, иштирокчиларнинг лойиҳага қизиқиши кутилгандан ҳам юқори бўлган. 33 нафар қатнашчининг барчаси курсни тўлиқ тамомлаган.
Якуний учрашувда иштирокчилар ўз блоглари бўйича шахсий ғояларини тақдим этди. Уларга сертификатлар ва эсдалик совғалари топширилди.
Эндиликда лойиҳа амалий босқичга ўтади. Унда иштирокчилар ижтимоий роликлар ва қисқа метражли фильмлар яратишда қатнашади. Таълим жараёни тўлиқ бепул ташкил этилди.
