Белу-Оризонти шаҳрида ўтган учрашувда “Крузейро” 1:0 ҳисобида ғалаба қозонган. Можаро ўйиннинг қўшимча дақиқаларида “Атлетико Минейро” дарвозабони Эверсон тўп учун кураш пайтида рақиб ярим ҳимоячиси Кристианни қўпол тарзда йиқитганидан кейин бошланган.

Шундан сўнг дарвозабоннинг ҳаракати “Крузейро” футболчиларининг кескин норозилигига сабаб бўлиб, ўйинчилар ўртасида тортишув ва оммавий муштлашув юзага келган. Жанжал майдоннинг катта қисмига тарқалган, унда захира ўйинчилари ва мураббийлар штаби аъзолари ҳам иштирок этган.

Оммавий тўқнашув бир дақиқадан ортиқ давом этган. Учинчи шахслар ва хавфсизлик ходимлари вазиятни тинчлантиришга ҳаракат қилган.

Маълум қилинишича, ўйин якунланганидан кейин ҳакам видеотакрорлар асосида 23 нафар футболчига қизил карточка кўрсатган. Улардан 12 нафари “Крузейро”, 11 нафари эса “Атлетико Минейро” жамоаси аъзолари ҳисобланади.

“Атлетико Минейро”нинг собиқ ҳужумчиси Халк бундай ҳолатни афсусли деб атаб, футболчилар жамоа ва мамлакат обрўси учун масъулиятни унутмаслиги кераклигини таъкидлади.