Равшан «Золотой» Интерпол томонидан қидирувга берилди

Ўзбекистон ҳуқуқни муҳофаза қилувчи органлари Равшан Мухитдиновни, «Равшан Золотой» лақаби билан танилган шахсни, халқаро қидирувга берди. Бу ҳақда маълумот Интерполнинг расмий сайтида эълон қилинган.

Маълум қилинишича, Мухитдинов Ўзбекистон Республикаси Жиноят кодексининг бир нечта моддалари бўйича айбланмоқда. Жумладан, 173-модданинг 3-қисми (мол-мулкни қасддан йўқ қилиш ёки шикастлаш), 242-модданинг 2-қисми (жиноий уюшма ташкил этиш) ҳамда 277-модданинг 3-қисми (безорилик).

Қайд этилишича, Равшан Мухитдинов 1988 йил 22 июлда туғилган. Мавжуд маълумотларга кўра, у ҳозирда Туркия ҳудудида яшаб, тадбиркорлик фаолияти билан шуғулланмоқда.

Ҳозирча иш тафсилотлари бўйича қўшимча маълумотлар ошкор этилмаган.