Янгиланган алифбо тўғрисидаги қонун 2027 йил 22 апрелдан кучга киради
Қонунга кўра, шу санагача чиқарилган ҳужжатлар, миллий валюта ва қимматли қоғозларда амалдаги алифбо ҳарфларининг бўлиши уларнинг амал қилиши ва муомалада бўлишига тўсқинлик қилмайди.
Амалдаги алифбо ҳарфлари туширилган давлат идоралари ва ташкилотларининг рамзлари ҳамда бошқа атрибутлари, биноларига ўрнатилган давлат гербининг бўртма тасвирлари, географик объектлар номлари ёзилган пешлавҳа ва кўрсаткичлар, шунингдек, Вазирлар Маҳкамаси белгилайдиган бошқа буюм ва манбалар яроқсиз ҳолга келгунча ёки қонунни амалга ошириш чора-тадбирлари дастурида белгиланган муддатга қадар ишлатилиши мумкин.
Ҳукуматга икки ой ичида ушбу дастурни ишлаб чиқиш ва қабул қилиш топширилди.
Gazeta алифбонинг янги вариантида 28 та ҳарф ва қаттиқлик белгиси ўрнида апостроф бўлиши ҳақида ёзган эди. Аввалги алифбода 26 та ҳарф ва 3 та ҳарф бирикмаси бор эди. Sh, Ch, Oʻ ва Gʻ бирикмалари ўрнига Ş, Ç, Ö ва Ğ ҳарфлари киритилади, Ng эса алифбодан чиқарилади.
Лотин ёзувига асосланган алифбо 1993 йилда 33 та ҳарф ва апостроф билан жорий этилган. Унда диакритик белгили Ş, Ç, Õ, Ğ, Ĵ (ж товушини ифодалаган, у «дж»дан фарқ қилади) ва Ń (нг товушини ифодалаган) ҳарфлари, шунингдек, «ц» товуши учун C ҳарфи бўлган. 1995 йилда диакритик белгили ҳарфлар Sh, Ch, Oʻ, Gʻ ва Ng бирикмалари билан алмаштирилган, C ҳарфи эса чиқариб ташланган.
Кирилл алифбосидан лотин ёзувига тўлиқ ўтиш 2000 йилгача якунланиши кутилган эди. Аммо амалда ҳозиргача мамлакатда алифбонинг икки — кирилл ва лотин ёзувидаги вариантидан фойдаланиб келинмоқда.
Президент 2020 йил октябрда ўзбек тилини ривожлантириш ва мамлакатда тил сиёсатини такомиллаштириш тўғрисидаги фармонни имзолаган. Унда лотин ёзувига тўлиқ ўтишни якунлаш белгиланган эди.